ఏపీ మున్సిపల్ ఎన్నికల బరిలో ఎంఐఎం.. 21 స్థానాల్లో పోటీ

ఏపీ మున్సిపల్ ఎన్నికల బరిలో ఆల్ ఇండియా మజ్లిస్-ఇ-ఇత్తెహాదుల్ ముస్లిమీన్ (ఏఐఎంఐఎం) పార్టీ నిలిచింది. రాష్ట్రంలోని రెండు కార్పొరేషన్లు, ఐదు మున్సిపాలిటీల పరిధిలో మొత్తం 21 మంది అభ్యర్థులను పోటీకి దింపింది.

వివరాల్లోకి వెళితే.. కడప కార్పొరేషన్ మేయర్ పదవికి, హిందూపురం మున్సిపాలిటీ ఛైర్‌పర్సన్ పదవికి ఎంఐఎం అభ్యర్థులు నామినేషన్లు దాఖలు చేశారు. వీటితో పాటు విజయవాడ కార్పొరేషన్‌లోని మూడు డివిజన్లలో, హిందూపురంలో ఐదు వార్డుల్లో, ఆదోనిలో ఏడు, రాయదుర్గ్‌లో మూడు, నంద్యాల, పెనుగొండ మున్సిపాలిటీల్లో ఒక్కో వార్డు చొప్పున అభ్యర్థులను బరిలో నిలిపింది.

ఇటీవలే ఏపీకి చెందిన ఎంఐఎం నేతలు హైదరాబాద్‌లో పార్టీ అధ్యక్షుడు అసదుద్దీన్ ఓవైసీతో సమావేశమయ్యారు. ఈ సందర్భంగా విస్తృతంగా పోటీ చేయడం కంటే, పార్టీకి గెలుపు అవకాశాలు బలంగా ఉన్న వార్డులు, డివిజన్లపైనే దృష్టి పెట్టాలని ఆయన సూచించారు. 

పార్టీ విస్తరణ ప్రయత్నాల్లో భాగంగా హైదరాబాద్‌కు చెందిన ఎంఐఎం ఎమ్మెల్యేలు జాఫర్ హుస్సేన్ మిరాజ్, మహమ్మద్ ముబీన్, మాజిద్ హుస్సేన్, ఎమ్మెల్సీ రియాజ్ ఉల్ హసన్ ఎఫెండీ ఏపీలో ప్రచారం నిర్వహిస్తున్నారు. ఆంధ్రప్రదేశ్‌ స్థానిక సంస్థల ఎన్నికల్లో తమ ఉనికిని విస్తరించుకోవడంలో భాగంగా పార్టీ ఈ ఎన్నికలను ప్రతిష్ఠాత్మకంగా తీసుకుంది.